歐聯：落後4粒豁出去 比達比歷焗攻大無畏_東方日報

歐霸盃第3圈外圍賽次回合，比達比歷主場迎戰辛連斯基，冰島球隊比達比歷首回合作客大敗2比6，今仗返回主場，惟有豁出去一搏，爭取盡快入波，希望創造奇迹收復失地，預料會大踢進攻足球，中位數2.5球嘅入球大值得追捧。

（周五凌晨1時30分開賽）

比達比歷原本係歐聯份子，但喺歐聯第2圈外圍賽遭哥本哈根「雙殺」，兩回合合計大敗3比8，只能降格轉戰歐霸盃，點知再遭遇滑鐵盧，首回合被辛連斯基大炒，明顯未夠班喺歐洲賽立足，今仗焗攻之下，防線難免空虛，失波機會更加大。

辛連斯基踢法開放

另一邊廂，辛連斯基首回合贏6比2，領先4球有大把本錢在手，今仗冇必要刻意防守。事實上，呢支波斯尼亞球隊以克羅地亞球員為骨幹，個人技術細膩，並且一向踢法開放，近4場比賽法定時間有3場總入球開出3球或以上，無懼同對手鬥攻，要再攻陷比達比歷防線，並唔困難，有望合演入球騷。