英超：主場重建後首度出擊 盧頓戰意旺大晒_東方日報

周六凌晨英超獨腳戲，新升班嘅盧頓主場迎戰韋斯咸，今仗係盧頓歷史上首次喺英超主場出師，亦係凱尼沃斯路球場重建後首場聯賽，球員戰意旺盛。不過今場對手韋斯咸開季狀態極佳，入球能力強橫，博2.5球大盤屬明智之選。

（Now 621周六凌晨3時直播）

盧頓今季首次征戰英超，實力明顯低一班，今季踢咗兩場聯賽都慘敗，分別1比4不敵白禮頓，以及0比3輸畀車路士，防線可以話弱不禁風，不過今仗首度喺重建主場出擊踢英超，肯定希望有好表現，佢哋周中英聯盃3比2贏基寧咸，希望可以打番起信心，預計今仗唔會死守。

韋斯咸勇銳唔會縮
韋斯咸今個夏天賣走隊長迪格蘭賴斯，不過收番1億鎊轉會費運用得宜，其中由修咸頓收購嘅中場禾特普斯極速融入，喺佢帶動下球隊快速反擊非常銳利，米查利安東尼奧、查洛保雲等攻擊球員狀態大勇，連續2仗3比1擊敗車路士同白禮頓兩大勁旅，球員士氣高昂。韋斯咸近5場聯賽，有4場總入球達3球或以上，2.5球嘅入球大值追。