阿根廷記者加斯頓艾度爾爆料，美斯出席完月尾金球獎頒獎禮後，會隨國際邁亞密展開亞洲之旅，分別喺中國及日本踢表演賽。美斯屬金球獎大熱，屆時可能攞埋獎座見球迷。 半年內第二度訪華 由於國際邁亞密無緣美職季後賽，踢埋10月22日煞科戰就收咧，球隊下月2日出發，6日之後喺中國成都踢一場表演賽，跟手轉去日本。由於美斯要出席法國時間10月30日喺巴黎舉行嘅金球獎頒獎禮，預料佢會搭私人飛機到成都同球隊會合。美斯帶領阿根廷贏得上屆世盃冠軍，一般相信佢可以順勢擸埋金球獎。美斯6月時曾隨阿根廷前往北京踢熱身賽，即係半年內第二度訪華。