雷法爾 ：兩軍入得又失得 獅吼勝利愛鬥「大」

恭喜發財！新一年筆者喺度首先恭祝各位波友橫財就手，今年繼續贏。今日有場澳職心水想同大家分享吓，就係布里斯班獅吼主場對墨爾本勝利。獅吼有首席射手軒歷基安達迪復出；勝利火力就係澳職第一，況且鋒將貝利沙狀態唔錯，今次兩軍交鋒與其估輸贏，不如直取1.7倍入球大仲穩陣。（有線64、203周五下午5:00直播）

獅吼首席射手復出
獅吼最近強勢回歸連勝3場，令佢哋重燃爭入季後賽資格，雖然球隊今仗缺少前鋒桑蘇拿辛奴，不過主帥法蘭斯話驚都未驚過，皆因球隊迎來首席射手軒歷基安達迪復出，火力計落有增無減。更何況獅吼喺自己地頭向來食住對手，今場仲唔乘勝追擊主動搶Win咩！

勝利火力冠絕澳職
之不過對手勝利唔係好蝦，佢哋暫時以37個入球排喺澳職入球榜榜首，場均至少攻入2粒。鋒將貝利沙更以9入球5助攻，成為聯賽入面參與入球最多嘅球員，有佢孭飛已經係士哥嘅保證。但弊在佢哋防線最近失魂，近3場勁失6粒，即使勝利連續3仗轟入3球都只係贏得1場咁多。即然呢班波入得又失得，大盤仲唔係最佳選擇？