笛子波童：皇馬-2勝鼓繼續響

C朗信心返晒嚟
皇家馬德里於今晚西甲壓軸登場作客鬥艾爾切，王牌射手C朗拿度上場歐聯終於打破入球荒，狀態、信心番咗嚟，相信以往入波如食生菜嘅情況將會重現。艾爾切除咗首循環大敗1比5畀皇馬，今季四鬥巴塞隆拿加埋一共吞咗十八隻光蛋，皇馬讓二球照捧讓球客勝。

（now 632及TVB 13周一凌晨4時直播）

皇馬早前喺打吡戰慘敗0比4，加埋C朗走去開生日Party受傳媒口誅筆伐，球隊陷入小低潮，但隨着C朗上場入波，帶領皇馬於歐聯16強首回合擊敗史浩克04，相信一切已雨過天青。球隊賽前收到好消息，養傷多時嘅莫迪歷已恢復操練，距復出之期不遠。雖然占士洛迪古斯、基迪拉仍在養傷，但新加盟嘅巴西中場盧卡斯施華上場已粉墨登場，初步表現算合格，要融入球隊問題不大。

艾爾切遇強手例被炒
艾爾切對上兩場聯賽先後擊敗華歷簡奴及伊巴，狀態唔錯，不過佢哋搶分多數集中喺同級球隊身上，拍埋實力高一級嘅前列球隊根本冇得揮。艾爾切今季對榜首三強，輸得最少係喺主場對馬體會輸兩粒，其餘首循環作客輸畀皇馬、聯賽雙循環及西盃16強兩回合鬥巴塞，全部都係淨輸三球或以上，今場皇馬讓二球，讓球客勝依然係不二之選。