走肖：銀河開大騷撥火

雙箭頭Ready迎美職開鑼
美職聽朝勁爆開鑼，衞冕總冠軍嘅洛杉磯銀河喺主場招呼芝加哥火燄，入球大值得吼實。雖然銀河有當路雲退役，新Icon謝拉特又未歸隊，不過隊長羅比堅尼已準備好攞威，拍住薩迪斯攻堅鋒力有番咁上下，撞正火燄前線實力強化，有條件夾計開大騷。

（開賽時間：周六早上11:00）

由於勞資問題，今季美職曾經傳出會停擺，幸好最後順利開鑼，最開心梗係一班球迷啦！力求衞冕總冠軍嘅洛杉磯銀河，明早會為美職打頭陣，新簽入嘅利物浦隊長謝拉特未歸隊的確可惜，不過銀河嘅主場入座率向來勁高，冇謝拉特一樣大把人撐，而且佢哋前線組合羅比堅尼同薩迪斯，上季喺常規賽攜手攻入35球，唔使擔心佢哋開鑼戰食白果。

羅比堅尼拒讓臂章
銀河隊長羅比堅尼賽前就喺twitter晒命，上載佢戴住美職冠軍指環嘅相。上季佢喺季後賽決賽加時入波搞掂新英倫革命，仲當選埋最有價值球員，開季前話明唔會將隊長臂章交畀謝拉特，講得咁口響，睇得出佢已經準備好迎接新球季，咁餓波梗係要入多幾球證明實力啦！

火燄射手有料到
至於對手芝加火燄，季前放走表現令人失望嘅射手安梳爾同龐高尼，取而代之係希爾星堡射手艾卡姆同AIK蘇納前鋒伊保拿尼基，佢兩個分別來自加納同尼日利亞，艾卡姆上季更加喺瑞超攻入16球，就算王牌馬基養緊傷唔踢得，火燄都有足夠兵力同銀河鬥入波，睇怕佢兩隊唔會喺美職開鑼戰就踢悶波趕客啩？