張健峰：巴利死火皇馬讓唔起

西甲「一哥」皇家馬德里今晚會喺聯賽造訪畢爾包，「銀河艦隊」近期火力減，加里夫巴利狀態大跌，令隊波長期靠C朗孤軍作戰，上輪聯賽失分已經係警號，相反畢爾包周中打入西班牙盃決賽士氣大振，藉地利有力保不敗，2.85倍「讓球主勝」屬心水之選。

（now632台周日凌晨1:00直播）

皇馬季初令對手聞風喪膽，皆因火力勁到無朋友，不過呢排明顯冇咁有霸氣，好大程度因為中場莫迪歷受傷，教練安察洛堤試過用基迪拉、伊拿拉文迪同盧卡斯施華代替，不過效果都唔好，雖然占士洛迪古斯周三出番球場練習，但仲未可以跟大隊操練，中場線創造力削弱，連帶以C朗為首嘅三叉戟入波都少咗。

本來傷兵滿營，加里夫巴利應該係C朗最有力嘅幫手，可惜呢把「匕首」近期表現低迷，自從畀自己球迷喝倒采後，連射門慾都減少，近6場比賽場均竟然只得2次射門，睇嚟佢嘅信心已經跌落谷底，今晚皇馬隨時又令粉絲失望。

畢爾包入決賽士氣高
對手畢爾包周中作客對愛斯賓奴，半場已經領先2球，下半場踢出極具紀律性嘅防守反擊戰術，令對手前線無啖好食，成功殺入西班牙盃決賽，士氣好到不得了。中場蒙尼恩同前鋒阿度里斯狀態唔錯，今晚偷唔偷到雞就睇佢哋喇！