阿占：巴素利焗攻波圖主W熱捧

歐聯16強之中，葡萄牙波圖對瑞士神奇球隊巴素利呢場，可能係最被球迷忽略嘅一對組合，但其實論競爭性絕對唔低。首回合喺瑞士兩隊打和1:1，不過有一個作客入球在手嘅波圖，今晚返主場就贏面好高，事關巴素利不擅作客，而且葡萄牙籍教練保羅蘇沙一向「忌藍」，今場一於熱捧波圖1.37倍主W！（有線62、202周三凌晨3:45直播）

無論係實力同經驗，波圖絕對係技高一籌。呢支葡萄牙勁旅喺首回合控制晒戰局，最後贏唔出梗係失望，好彩揸住番個作客入球在手，咁就意味住以穩守突擊為主嘅巴素利，今場作客要入到波先有機會晉級，以波圖班球員豐富嘅歐聯經驗，絕對可以喺呢方面搵到着數。

巴素利作客走樣
波圖今季歐聯主場出擊有3勝1和不敗成績，而且入波板斧多多，哥倫比亞射手積臣馬天尼斯當然係王牌「士哥拿」，基斯甸泰路同哥利斯馬嘅速度同突破能力亦係一大殺着，仲有死球專家巴謙美專門破密集，真係唔憂冇波入。

巴素利踢法就比較單調，好多時作客表現都走樣。睇番分組賽3場作客賽事得1和2負，連對住盧多格德斯都要輸！佢哋位葡萄牙教頭保羅蘇沙球員時代曾効力賓菲加同士砵亭，係人都知呢兩隊係「藍軍」波圖死敵嚟啦，佢自己以往13次對住波圖，都只係贏過2次咁大把，冇咩好數據支持，連心理都輸埋，今場睇怕都係凶多吉少。

首回合：波客和1:1

頂占筍盤：波圖（主勝）