熱身賽：美國之旅次站撻着晒 曼聯鬥般茅火力全開_東方日報

曼聯「美國之旅」季前熱身賽第2站，火併另一支英超球隊般尼茅夫，「紅魔鬼」曼聯上場以2比1擊敗韋斯咸，中前場球員有不俗發揮，創造唔少攻勢，已操起狀態，勢必乘勝追擊。至於般尼茅夫上仗贈愛華頓3蛋，攻力有保證，肯定多入波睇。（Now 621周四早上9時30分直播）文:Mic少

曼聯開操後首場熱身賽打和列斯聯0比0，但隨着操練日子增加，球員狀態愈來愈好，並且鬥心十足，上場對韋斯咸，一開波立即搶攻，踢咗5分鐘就獲得12碼，由般奴費南迪斯射入打開紀錄，仲未計海倫曾經勁射中柱彈出，以及阿密特迪亞路射門入網，僅僅越位食詐胡，進攻組織方面比上季流暢。新簽前鋒馬菲奧斯根夏已逐漸融入球隊，相信可以進一步提升攻力，即使另一位前場新兵麥比奧莫仍未準備好披甲，但以「紅魔鬼」現有人腳足以撕破般尼茅夫防線。

般尼茅夫近期踢熱身賽非常落力，繼以6比2大炒布里斯托城之後，上場再贏愛華頓3球，可見球員並冇因為抖暑影響狀態。

熱身賽冇包袱盡情鬥攻
事實上，般尼茅夫近年有明顯進步，上季英超位列第9，遠高於排15位嘅曼聯，上年12月更加作客大勝「紅魔鬼」3比0。睇埋往績，兩隊近4次交鋒，般尼茅夫獲得2勝2和，未踢已先贏信心，相信會採取主動強攻對手，因此佢哋近4次對賽有3次總入球開出3球或以上，加上今場只係熱身賽雙方都冇包袱，預料會繼續盡情鬥攻，入球騷可期。