英超：訪升班隊睇定嚟食 愛華頓半場和啱數_東方日報

英超首輪壓軸戰，新升班嘅列斯聯主場火併「拖肥」愛華頓。列斯聯上季英冠奪冠升班，不過今季擴軍力度有限，上到英超未必夠砌；愛華頓今季繼續增兵，不過「天才」主帥莫耶斯向來穩陣，近4場熱身賽全開半場和，相信今場又係睇定嚟食，捧半場和。(Now 621周二凌晨3時直播)文:邪神

列斯聯上季英冠成績突出，全季46場攞足100分，總共攻入95球更遠遠拋離次席般尼嘅69球，亦因為表現好，升上英超後大部分班底獲留用，今夏增兵亦唔見大手筆，新簽入嘅桑恩朗達夫同卡維特利雲都係「失意軍人」，過到嚟列斯聯要孭重飛，實在有啲勉強。今夏熱身賽所見，列斯聯3場熱身賽分別對曼聯、維拉利爾同AC米蘭，全部和波收場，今晚係佢哋英超首輪亮相，相信都會踢穩陣波。

列斯聯靠「失意軍人」孭飛
愛華頓上季中獲美國財團入主，財困一掃而空，並重召莫耶斯回巢領軍，上季成績企穩，今夏大事擴軍，包括最近借入基亞利殊，以及收購達斯貝利賀爾、泰亞路比利等，又拉隊到美國集訓，準備充足。不過基亞利殊今夏冇參加曼城集訓，僅獨自操練，狀態成疑，加上同愛華頓未夾過，今場就算上陣都未必有太大作用。

今場兩隊鬥秤，愛華頓點都高啲，不過莫耶斯領軍唔會太冒進，加上今場作客，相信會守住先；睇番「拖肥」今夏熱身賽，雖然僅得2和4負未贏過，但佢哋有個特性，就係6場當中有5場開半場和，近4場更全開半場和，可見莫耶斯鍾意謀定後動，相信今場都唔例外，一於捧半場和。

莫耶斯：我會解放基亞利殊

愛華頓今夏積極組軍，多位新兵入面，最受注目肯定係由曼城借用嘅基亞利殊，領隊莫耶斯對呢位英格蘭球星寄以厚望，更表明希望佢可以成為「新連格」！

連格翻生係人辦
雖然基亞利殊加盟只有一個星期，但莫耶斯就暗示首戰對列斯聯考慮派佢上陣，仲話會以連格為「人辦」，幫呢位29歲球星重振聲威︰「當年我將連格帶去韋斯咸，冇人預期佢會成功，甚至有啲睇死佢，但佢最後幫自己重返英格蘭國家隊。」

同時，基亞利殊近年多數踢翼鋒，不過莫耶斯就準備將佢解放，發揮佢嘅進攻潛能：「基亞利殊可以踢幾個位，無論翼鋒到中場都冇問題，我嘅目標係將佢放喺最具創造力嘅位置，令佢可以入波同助攻，我會幫佢完成呢項挑戰。」