英聯盃：落難兄弟靠盃賽發圍 狼隊韋斯咸翻身大作戰_東方日報

英格蘭聯賽盃第2圈有場全英超對決，狼隊主場迎戰韋斯咸。兩隊今季可謂「難兄難弟」，英超頭兩輪同樣全部輸晒，佔據榜末最後兩個位置，今場正宗「海軍鬥水兵」，兩隊都靠唔住，不過雙方近年交手都多波入，近5次對賽4次開3球或以上，一於捧中位數2.5球入球大。（無綫myTV SUPER周三凌晨2時30分直播）文:邪神

狼隊今夏出售主力馬菲奧斯根夏同艾洛利，但新補充人腳似乎未適應，英超開季即淨吞曼城4蛋，上輪作客般尼茅夫輸0比1，兩場失咗5球未入過波，慶幸嘅係，暫時未聽到領隊域陀佩利拉有帥位危機，何況球隊今季賣咗咁多主力，季初成績差實在唔關佢事，不過睇嚟球隊當務之急，都係先以聯賽為重，盃賽或會派副選應戰。

樸達帥位不穩誓搏盡
韋斯咸今夏同樣有古達斯離隊，進攻陣容未有增援，但佢哋情況比狼隊更差，聯賽首仗0比3輸畀新特蘭，上輪主場對車路士再大敗1比5，兩場失咗8球僅入1球，得失球仲曳過狼隊，依家排名墊底。

查實韋斯咸自從前季炒咗莫耶斯後可謂自毀長城，搞到內部「立立亂」，上季盧比迪古執教僅半季就因成績太差被炒，半途接手嘅樸達帥位都未坐穩，依家開季又輸鑊甘，備受壓力隨時又被炒，如此惡劣情況下，實在需要一場漂亮勝仗嚟重拾士氣，今場英聯盃相信會較為肉緊，不過「錘仔幫」表現太差信唔過，寧揀入球大。