蘇斯黑柴：大熱禾堡主場得米

升勢德甲迎擊跌勢意甲
史浩克04前晚歐聯出局屬意料中事，但作客巴拿貝擊敗皇家馬德里已經為德甲攞晒彩，事實上德甲水準近年喺歐洲確處於升勢，相反意甲水準下滑明顯。今晚歐霸盃16強首回合，德甲二哥禾夫斯堡主場迎戰意甲中游國際米蘭，禾堡讓半一照撐上盤。

（有線61及64台周五凌晨2時直播）

有財團大眾汽車幕後支持嘅禾夫斯堡財大氣粗，係今季德甲使錢最豪球隊，歇冬期以3,200萬歐元收購車路士嘅德國國腳舒賀爾尼，足見其志不少，佢哋亦係德甲歇冬後最強勢球隊，主場仲曾以4比1大破班霸拜仁，雖然上輪聯賽以0比1不敵神奇球隊奧格斯堡，終止三線作戰15場不敗紀錄，但表現其實唔差，下半場羅賓洛治更曾為球隊扳平，可惜被球證誤判詐胡，輸得有啲唔抵。

不過輸咗呢場後，禾堡今季聯賽要做嘅嘢已經唔多，落後拜仁11分爭冠無望，但領先慕遜加柏9分個「二哥」位亦企得好穩，可以全心全意喺歐霸盃爭佳績，前線巴斯杜斯、奇雲迪布尼同卡利古尼狀態大勇。事實上禾堡已經被馬會捧成6倍嘅歐霸冠軍大熱門，根據德國《圖片報》報道，佢哋全隊球員喺抽籤知道對手係國際米蘭時集體歡呼，足見成竹在胸，今晚主場出擊值得追捧。

國米實力大不如前
國際米蘭曾經係意甲豪門，但近年經已大不如前，目前只排喺意甲第8位，距離第六位嘅森多利亞仲有6分差距，下季想踢歐洲賽都幾艱難，教練文仙尼喺曼城已經證明咗能力有限，球隊近期狀態亦差，近2場聯賽得1分，加上近3場歐霸作客分別對聖伊天、卡拉巴克同些路迪都贏唔到，今晚作客面對實力更強嘅禾堡注定冇運行。