芬蘭盃：古比斯鬥後勁半和好路_東方日報

今晚芬蘭盃4強戰上演芬超內訌，由古比斯硬撼查路。雖然古比斯喺聯賽排名高過查路，但近期比賽都玩留前鬥後，加上今仗屬一場過淘汰賽，難免要踢得穩打穩紮，半場和更值博。（周四凌晨1時開賽）文:法達斯維

古比斯依家喺芬超排第4位，比第8位嘅查路足足多咗19分，睇得出大家喺「長途賽」上實力差距，難怪今仗主Ｗ只得1.31倍咁熱喇！斯維冇懷疑過古比斯可贏波晉級，但佢哋各項賽事近4場僅1勝，其中2場冇波入，若計近6仗有5次半場同對手打和，可見喺頻密賽程之下，古比斯考慮到體能分配等問題，唔會每分鐘都去到盡，上半場多數會刻意拖慢節奏，採用易邊後先撳掣嘅策略。

近3對賽半場未分高下
另邊廂，查路各項賽事近3場輸咗2場，狀態亦麻麻，睇埋雙方近3次正式賽事交手，各得1勝1和1負，對賽上不相伯仲。唔好忘記，同聯賽唔同，今仗係一場過淘汰賽，變數更大，距離決賽只有一步之遙，但稍有差池隨時出局，踢得保守啲亦可理解，而且啱啱提到近3次正式賽事碰頭，全開半場和，預計今仗初段都會陷於膠着，半場和不妨再追。