巴西盃：首回合領先！哥連泰斯細守江山_東方日報

巴西盃8強唯一一場非全巴甲戲碼，巴甲球隊哥連泰斯主場對巴乙嘅帕拉尼恩斯，首回合哥連泰斯作客贏1比0，今場返主場照計贏波十拿九穩，問題係今場形勢上佢哋唔失波就晉級，做好本分就掂，帕拉尼恩斯恐怕無力翻身；哥連泰斯近5場主場4次開2球或以下，2.5球入球細屬明智之選。（周四早上8時30分開賽）文:邪神

哥連泰斯排喺巴甲中游嘅12位，高不成低不就，既然巴西盃入到8強，梗係要搏埋佢。睇番佢哋今屆巴西盃表現，第3圈至今踢咗5場，4次開2球或以下，最犀利係5場不失1球，可見佢哋防守相當硬淨，而防守好係爭盃嘅必要元素；至於進攻，荷蘭國腳「射手王」迪比剛應付完世盃外，今場無法上陣，不過唔緊要，既然佢哋首回合領先1比0，今場做好防守就過關，問題不大。

帕拉尼恩斯魔咒難破
帕拉尼恩斯今季暫時排巴乙第8，距離升班線差5分，爭升班仲有得傾，對於該隊嚟講可能聯賽重要啲；至於巴西盃，原來佢哋近年中咗「8強魔咒」，已經連續3屆8強出局，今屆8強首回合又先喺主場輸波，今場作客防守力甚強嘅哥連泰斯，睇怕翻身無望。睇形勢今場最大機會係悶和「窿窿」，或者哥連泰斯小勝1粒，不過最穩陣都係捧入球細。