Combo King ：奧蘭多城再靠卡卡食胡

今季美職球隊數目及星味都上升，值得留意；新加入聯賽嘅奧蘭多城擁有卡卡助陣，有姿勢有實際，呢位巴西中場上仗即扮演救世主，補時入波為球隊逼和紐約城1比1，贏盡口碑。美國人最崇拜「超級英雄」，卡卡自然深受球迷支持，亦壯大球隊聲勢。奧蘭多城今仗作客侯斯頓戴拿模，有得受讓，阿King力撐讓球客勝。

（周六早上7時開賽）

奧蘭多城首仗聯賽主場對紐約城已吸引超過六萬人入場觀戰，就知球隊猛料，佢哋當時踢少一人劣勢下，由首席球星卡卡射入扳平，充滿荷里活式電影橋段，即使贏唔到波，但都夠晒噱頭，亦增強球隊士氣及信心。

侯斯頓冇火力讓唔起
事實上，有球星卡卡在陣，一眾隊友都會比較淡定，今仗無懼同侯斯頓戴拿模硬撼。侯斯頓戴拿模今季請來前韋根領隊奧雲高尼執教，首仗小勝哥倫布機員1比0，防守有改善，但進攻平平無奇，讓波只因「美職資歷」勝奧蘭多城，實在信唔過。

西甲方面，華倫西亞今季主場曾經擊敗兩大勁旅馬體會同皇家馬德里，威力非同凡響，今仗對手只係下游球隊拉科魯尼亞，華倫西亞淨贏兩球冇難度，直取讓球主勝。

（周六凌晨3時45分開賽）

蘇超鴨巴甸主場對馬瑟韋爾，鴨巴甸實力高於對手，加上上周冇波踢，以逸待勞，炒得起馬瑟韋爾。

（TVB 301周六凌晨3時45分直播）