沙特職：賓施馬領軍決戰C朗 伊蒂哈德力抗艾納斯_東方日報

星光熠熠嘅沙特職，一開咧即掀起高潮，由賓施馬率領嘅伊蒂哈德，今晚立即要同C朗領軍嘅艾納斯正面交鋒。有C朗同祖奧菲歷斯掛帥嘅艾納斯，開季連場大勝鋒芒畢露，不過對手實力一般，今場先係真正考驗；坐擁賓施馬嘅伊蒂哈德上季霸氣奪冠，踢法實而不華，藉主場之利可以秤先，讓球主客和仲有得受讓咁筍，讓球主勝（+1）咪錯過。

（on.cc東網周六凌晨2時直播）文:法達斯維

艾納斯今夏重建鋒線，簽入祖奧菲歷斯同京士利高文，配合C朗拿度同沙迪奧文尼組成夢幻鋒線，開季3場聯賽贏晒兼狂入12粒，連同各項賽事更豪取5連勝，當然對手只係艾塔亞文、吉達體育會之流，見到勢兇夾狼嘅艾納斯，梗係腳仔軟喇。

主場近13戰未輸過
睇番艾納斯陣容略嫌頭重尾輕，中後場實力明顯較遜色，尤其係強強對碰下，採用呢種強攻打法，後防不穩嘅弱點表露無遺，就以今夏沙超盃決賽為例，艾納斯喺末段一度領先2比1下，最後時刻被吉達艾阿里扳平，最終更於互射12碼飲恨，難怪C朗自加盟艾納斯後，仲未喺正式賽事奪冠喇。

另邊廂，雖然伊蒂哈德喺今夏沙超盃4強輸畀艾納斯，但佢哋似乎不太重視呢隻盃仔，而且喺法國主帥白蘭斯帶領下，無論組軍同戰術都走高效路線。除咗王牌前鋒賓施馬領軍外，尼高路簡迪、法賓奴泰華利斯、艾奧亞等「法語系」組成嘅中場線，實而不華，上季僅輸3場兼且係失波最少球隊，論攻守平衡比艾納斯更勝一籌，亦係佢哋上季後上封王嘅最大原因。

伊蒂哈德今夏引入馬馬度杜姆比亞、羅渣費南迪斯等猛將，實力進一步提升，連續頭3輪聯賽全勝，佢哋已錄得跨季聯賽9連勝佳績，而且喺地頭出擊威力驚人，近13場主場錄得12勝1和，今仗有力擊敗艾納斯，受讓嘅讓球主勝（+1）必捧，進取啲不妨直取主勝。