Mic少 ：維拉活捉病貓

現排聯賽榜第16嘅新特蘭主場對17嘅阿士東維拉，「黑貓」新特蘭近期非常黑仔，主將阿當莊臣涉「衰十一」被球會雪藏，領隊普耶上仗同侯城主帥布魯士嗌交，被英足總控告行為不當，總之諸事不順，難免打擊護級士氣。反觀阿士東維拉改由舒活執教後，愈來愈上力，更連贏兩場「中部打吡」，大大振奮軍心，今仗有得受讓平半，當然捧維拉下盤。

（now 623周六晚11時直播）

新特蘭當黑 舒活抽水
阿當莊臣係新特蘭今季聯賽入波最多嘅球員之一，卻喺護級關鍵時期鑄成大錯，打亂晒領隊普耶嘅部署，搞到佢上仗情緒失控，被球證趕出場。連主帥都方寸大亂，肯定影響球員士氣。「黑貓」內部可謂愁雲慘霧，加上近6仗未贏過，只入得兩球，恐怕短期內難翻身。

維拉連續兩場「中部打吡」擊敗西布朗，並打入足總盃4強，反映上月中接手領軍嘅舒活已摸清楚球隊，踏入收成期。事實上，舒活上季都係中途臨危受命執教熱刺，有危機管理經驗，由佢率領維拉打護級戰，相信可以獲得成功。更何況兩隊近7次對賽，維拉取得3勝4和，受讓相當抵玩。