笛子波童：雙城戰狐狸與虎謀皮

包尾大幡「狐狸」李斯特城主場迎戰第15位嘅「老虎」侯城，侯城周中剛宣布同領隊布魯士續新約，對護級前景充滿信心。李斯特城近六場聯賽輸五場，進攻方面冇咩板斧，就算有主場之利都唔好抱太高期望，「狐狸」讓平半寧捧下盤。

（now 624周六晚11時直播）

侯城同布魯士續約振軍心
侯城現領先尾三嘅昆士柏流浪五分，仍未擺脫降班危機，不過球會周中提前宣布同領隊布魯士續約，目的自然係想穩定軍心。侯城對上五場聯賽兩勝兩和一負，其中擊敗同屬護級分子嘅阿士東維拉、昆士柏流浪更大大增強球員嘅比賽信心及士氣，今次作客都冇有怕。

李斯特城近六場聯賽輸五場，輸畀曼聯、阿仙奴及曼城嘅整體表現都獲得唔錯評價，但要留意呢三場佢哋都係下風波，主力防守以一分為目標，相反另外兩次主場出擊卻先後以○比一輸畀中游隊伍史篤城及水晶宮，反映佢哋進攻板斧唔多，一旦主攻反而暴露更多空位畀對手打反擊。

仲有一個數據可供參考，李斯特城今季聯賽只係贏過四支球隊，包括史篤城、曼聯、阿士東維拉及今場對手侯城，李斯特城同前三者已完成兩循環對賽，結果都冇辦法雙殺對手，就算主場出擊亦好大機會無法贏波，捧下盤啱數。