沙職：新帥領軍力爭反彈 伊蒂哈德炸爆艾費哈_東方日報

沙特職重開，今晚東網直播雙響炮頭場，有艾費哈主場迎戰伊蒂哈德。衞冕嘅伊蒂哈德怒炒白蘭斯，葡萄牙名宿干斯卡奧接手球隊，「新帥效應」加持下會反彈，而且伊蒂哈德實力雄厚，近4次對艾費哈3勝1和，客勝屬信心之選。

（on.cc東網周五晚11時05分直播）文:邪神

伊蒂哈德上季強勢重奪沙職冠軍，會方似乎過於自滿，今季未有重大收購，最重磅只係由布拉加簽入翼鋒羅渣費南迪斯。雖然伊蒂哈德實力依然頂級，但上季奪冠後，球員對勝利饑渴感大減，季前備戰亦不足，例如今夏訪港出戰沙超盃就輸畀10人應戰嘅艾納斯，雖然佢哋聯賽開季3連勝，但上輪再對艾納斯又落敗，連同亞冠精英盃2連敗，主帥白蘭斯最終孭鑊下台。

主隊遇強腳都軟
換帥後嘅伊蒂哈德有國際賽檔期回氣，可以當做重新出發，50歲嘅新帥干斯卡奧曾率領波圖3奪葡超冠軍，上季執教AC米蘭未成功，嚟到伊蒂哈德肯定想有一番作為，首場領軍梗係要打響頭炮。儘管球隊只係沿用上季奪冠班底，不過有賓施馬、尼高路簡迪、法賓奴、貝雲積等星級陣容已經夠殺。

艾費哈係沙職中游球隊，季初贏過兩支弱旅艾法特及艾拿積馬，面對同級對手卡赫利即落敗，現時喺聯賽排第9，面對伊蒂哈德隨時未踢先怯，預計會憑主場之利加強防守，只能輸少當贏。