亨格比利 ：意甲型帥對決 費倫上盤得米

蒙迪拿送恩沙基一程
兩位紅褲子出身嘅型帥蒙迪拿同恩沙基，今晚會喺意甲戰場正面交鋒。費倫天拿傷停問題唔少，但以「飛機仔」嘅調兵遣將能力，加上「古達度2.0」穆罕默德沙拿嘅Fit爆演出，主場出擊照殺AC米蘭，「紫百合」讓半一捧上盤。

（TVB301周二凌晨2:00直播）

正所謂矮仔多計，蒙迪拿踢波嗰時大把計仔「士哥」，估唔到家陣教波一樣咁醒。2011年先展開執教生涯嘅佢，撈咗唔夠5年已經被意媒封為新一代「戰術大師」，大讚佢變陣變得出神入化之餘，最犀利係經常將球員安排踢非慣常位置，但效果又出奇地咁好，佩服、佩服！

穆罕默德沙拿狀態大勇
「紫百合」上輪聯賽勁吞拉素4蛋，錄得近3年嚟最大敗仗，連續13場不敗走勢亦都告終，一眾戰將當然想喺自己地頭做番齣好戲。冇錯，守將托莫域要停賽，中場大衞比沙路亦喺歐霸鬥羅馬場波拉傷大腿肌肉，證實要抖1個禮拜，不過米卡李察士同巴迪積可以頂兩人個位，影響唔算好大。

最重要係生力軍穆罕默德沙拿狀態大勇，1月由車路士來投之後已經入咗6球，周中歐霸盃亦交出1次助攻，弗到爆嘅表現真係令人覺得古達度冇走過一樣，由佢同侯馬喺前線孭飛，邊使愁冇波入吖！

AC前線冇人靠得住
同蒙迪拿一樣咁型嘅恩沙基，教波就差「飛機仔」幾班，就快落鑊嘅佢，最近帶隊錄1勝3和戰績，睇落好似止咗頹，實情對手只係安玻里、切塞納同維羅納呢啲二打六，4場不敗唔足以反映球隊表現。況且中場悍將安德列普利要停賽，而無論阿利斯奧施斯搭柏仙尼，定抑或本田圭佑搭文尼斯嘅前線組合都唔多Work，今晚作客相信死路一條。

盤路解碼
今季費倫天拿讓球盤路13勝1走9負

Data King：AC作客冇料到
?費倫天拿連開6口角球細。

?AC米蘭今季意甲作客僅獲2勝。

?雙方近4次喺法蘭基球場交手大細梅花間竹。

乜都玩錦囊：玩埋紫百合4.4倍「和主」
費倫天拿習慣下半場先嚟料，今季意甲開出10次半場和波，半場和比率超過5成，信「紫百合」贏波嘅話，不妨玩埋4.4倍「和主」。