SAMVO肥叔：以色列有料威畀你睇

每逢嚟到國際賽期，通常個市交投都好淡靜，一來強弱懸殊嘅對碰，強隊往往都讓得好辣唔多值博，二來依家正值歐洲各大聯賽轉彎入直路階段，球員都唔想因踢「太公波」而受傷，畀「米飯班主」球會高層詐型，難免會就住嚟踢，既然贏1球同贏10球都係擸3分，又使乜贏咁多？留番啲力為球會做最後衝刺好過喇，因此班大戶呢排都冇乜動靜，寧願休息吓。

威爾斯受讓引人落疊
雖然強隊唔多抵玩，但唔代表冇筍嘢，肥叔睇中歐國外B組大戰，以色列主場撼威爾斯，後者有皇馬「大聖爺」加里夫巴利同阿仙奴「死神」艾朗藍斯孭飛，依家2勝2和排次席，理應被睇高一線。不過，成隊都係奀星嘅以色列，初盤竟要讓平半，係咪開錯盤呀？

睇番佢哋喺B組頭3場贏晒排榜首，包括上輪於主場大炒波斯尼亞3蛋，絕對唔嘢小，較為出名嘅威爾斯受讓兼高水咁筍，有咁大隻蛤乸隨街跳，你當班莊家會計錯數？擺明引你落疊喇，肥叔認為以色列呢個上盤值得捧場。

（周日凌晨1時開賽）