亨格比利：塞爾維亞「大」件事

嘜死C朗放生後上3子
「車路士雙煞」惡鬥C朗，淨係呢個Match Up都夠晒睇頭啦！今晚葡萄牙喺主場迎擊塞爾維亞，客軍兩位鐵血「藍戰士」賽前講明，已經諗好晒計仔箝制呢位葡國「萬人迷」，而且塞爾維亞被扣分後再冇失分空間，今晚呢場歐國盃外圍賽I組賽事必定同葡萄牙死過，2.15倍大玩得過。

（有線61及201周一凌晨2:45直播）

上年年尾塞爾維亞喺主場鬥阿爾巴尼亞場波，由於有球迷搞事，塞爾維亞事後被罰扣3分，加上及後輸畀丹麥，令佢哋家陣喺I組身陷險境，暫時得1分排喺尾2，受形勢所逼，今場作客都焗住要搶攻，唔慌踢得保守。齋睇塞爾維亞新帥古錫徵召咗出名臭脾氣嘅羅馬攻擊中場拿積，就知呢位教頭準備高舉喪攻大旗啦！

塞爾維亞被扣分焗搶攻
伊雲洛域賽前受訪時話，有信心拍住車路士隊友尼曼查馬迪凍結C朗，但咪忘記拿尼今季重返葡超班霸士砵亭之後重生，今季已經有6個聯賽士哥，仲勁過喺曼聯嗰陣，塞爾維亞走漏佢同丹尼艾維斯、摩天奴3位好波之人嘅話，隨時出事！

比比打柴葡軍防線有隱憂
今場波喺賓菲加球場開戰，前日已經賣咗5萬張波飛，預期今晚會座無虛席。領隊費蘭度山度士今仗雖然繼續停賽，只可以喺限制區域睇波，兼且唔准同任何職球員有接觸添，但佢早就為葡軍設計咗條「30+」方程式，而且佢上任後即刻整咗套地面快攻戰術，早輪仲砌低埋世盃亞軍阿根廷，堅勁！

仲有一點，今場波另一焦點人物C朗，剛啱輸咗場「國家打吡」，今晚當然想入多兩粒搵塞爾維亞祭旗啦，只可惜葡國防線大將比比因為肌肉受傷，好大機會缺陣，前面入埋隨時唔夠後面輸，與其冒險博葡萄牙W，倒不如轉玩有啲分頭嘅入球大仲好。

Data King:：塞軍外圍賽例有士哥
?雙方近兩次喺歐國盃外圍賽交手都打成1:1。

?葡萄牙連開3口半場和。

?塞爾維亞今屆3場歐國盃外圍賽都有波入。