阿占：德國炒格-2照捧讓客

邊緣國腳要搏殺
德國去年夏天登上世界頂峰之後，家陣正進行換血重新出發，佢哋今晚喺歐國盃外圍賽D組作客格魯吉亞，領隊勒夫賽前向一眾表現麻麻嘅老將下達「最後通牒」，奧斯爾、普多斯基、根度簡等老臣子地位岌岌可危，今場唔搏命隨時會被邊緣化，以「日耳曼戰車」嘅雄厚實力，今場係時候騷Quali，-2照捧2.3倍「讓球客勝」！

（有線61、201及中央5台周一凌晨0:00直播）

格魯吉亞唔夠班
德國領隊勒夫早前落實續約後，當然要為長遠發展鋪路，佢賽前表明即將會由U21提拔新血，同時又話嚟緊3場歐國盃外圍賽唔會大變，擺明話呢3場波係一班老將嘅「最後機會」。雖然勒夫冇開名，但傳媒估計奧斯爾、普多斯基、舒賀爾尼、根度簡同基迪拉等係「目標人物」，事實上以安利簡恩為首嘅小國腳來勢洶洶，班老鬼唔爭氣點掂？

德國依家喺D組同蘇格蘭、愛爾蘭同得7分，齊齊落後榜首波蘭3分，德國要出線應無難度，但總經理比亞荷夫賽前講明一定要攞小組首名先至收貨。睇番「日耳曼兵團」今戰有喺對澳洲場熱身賽休戰嘅紐亞復出把關，格魯吉亞喺分組賽除咗贏「魚腩」直布羅陀之外其餘3場輸晒，上一輪主場都吞波蘭4隻蛋，鬥德國想輸少粒都難囉！

歐國盃D組

頂占筍盤：德國（讓球客勝）