笛子波童 ：日本除烏-1冇難度

國際熱身賽日本於東京味之素球場迎戰同樣來自亞洲嘅烏茲別克。日本新領隊夏利荷錫上仗刻意為球隊注入本土新元素，但到最尾仍要依靠一眾外流球星落場先順利打響頭炮，無論今場佢故技重施抑或復用常規正選，相信以日本嘅整體實力要贏烏茲別克兩粒唔難，一於捧1.95倍讓球主勝。

（有線61及201台周二晚6時25分直播）

日本新領隊夏利荷錫喺上場擊敗突尼西亞嘅正選11人名單中，只有長谷部誠、清武弘嗣、酒井宏樹及吉田麻也四名外流球員，其餘七人全屬本土兵，當中起用人氣球星武藤嘉紀夥拍一對名古屋鯨魚前鋒組合永井謙佑及川又堅碁，呢個「前線鐵三角」係就係有新鮮感，可惜三人活力有餘，默契、經驗都有所不足，令日本初段贏形勢但冇波入。直至下半場先後調入本田圭佑、香川真司及岡崎慎司後，球隊先搵到破關方法，證明現階段嘅日本仍然非常依賴呢班外流球星。

作為上任第一擊，夏利荷錫尋求轉變絕對抵讚，就算暫時未見到成效，亦可以畀陣中年輕球員吸收更多大戰經驗，而且從上仗所見，日本隊現時嘅板櫈深度亦畀到球迷信心，無論今場起用上仗原班人馬、抑或用番常規球員打正選，萬一需要臨場變陣亦唔需要擔心。

烏茲別克作客捱打
烏茲別克上場熱身賽打和南韓1比1，但現時由史泰歷克執教嘅「太極虎」，論整體戰鬥力及侵略性都比日本隊遜色，預計烏茲別克會比上仗遭受更多壓力，日本主Ｗ冇咩肉食，一於捧1.95倍嘅讓球主勝。