科娜：般尼茅夫執到寶玩大佢

英冠球隊趁國際賽期動作多多，隊隊都執吓位，其中最轟動就係般尼茅夫借得卡迪夫城神射手堅韋尼鍾斯，般尼茅夫今次執到寶，攻力大大增強。呢支英冠「一哥」今晚將作客葉士域治，一於追大盤！

（TVB 301周六凌晨零時15分直播）

借入堅韋尼鍾斯添攻力
堅韋尼鍾斯踢過英超新特蘭同史篤城，證明有一定卡士，今季跟住卡迪夫城降班嚟到英冠，喺冇乜支援下都入到11個聯賽入球，成為球隊神射手。通常球會決定將球員外借，都係揀一啲隊中冇乜上陣機會嘅人，不過「卡城」竟然將核心球員借走，令人「Ｏ晒嘴」，領隊羅素沙拉迪就解釋呢個純粹係商業決定喎。

結果攻力冠絕英冠嘅般尼茅夫爭贏堅韋尼鍾斯，般尼茅夫原本已有比列比文、哥林威爾遜同卡莫根特3大射手，依家再加埋鍾斯，領隊艾迪侯域大把好牌喺手。而葉士域治最近亦借入中場莊尼威廉斯同後衞費耶斯，其中細細粒嘅莊尼威廉斯扭得又傳得，有望成為球隊中場發電機，葉士域治近6次主場面對般尼茅夫有5次開大，今場大盤好路。