黃興桂：紅軍追仙趕魔 恐有心冇力

點解會話利物浦背城借三，而非背城借一呢？因為聯賽排緊第5嘅佢哋，落後3哥阿仙奴同第4嘅曼聯6分同5分，今晚去到北倫敦作客阿仙奴，目標當然係擸晒贏波3分啦！不過要喺酋長球場全取3分，真係談何容易呀？

Peter永遠唔講模棱兩可嘅說話，是其是、非其非，唔會出現應該、早知等詞語，雖然紅軍戰意唔使懷疑，但計實力計狀態，若果今仗能夠和波已經收貨。阿仙奴依家只係比曼聯多1分咁大把，如果和波隨時會畀紅魔搶咗個3哥位都幾大件事，須知英超第3同第4雖然都可以參加歐聯，但季軍係直入分組賽圈，但第4嗰隊就要踢附加賽，有乜閃失隨時得個桔，因此阿仙奴今仗就算遇上不許和不許敗嘅利物浦，主帥雲格一樣唔敢怠慢，因此值得秤先少少。

7月去獅城歎好波
早前講過喺今年7月15至18日於新加坡舉行，有阿仙奴、愛華頓同史篤城東來嘅2015年巴克萊亞洲錦標賽，將會在當地全新、全天候兼有上蓋嘅新球場進行比賽，戲碼咁強勁，Peter點都要返去至愛嘅獅城，欣賞呢項球壇盛事。