張健峰：馬體會科騷撐「讓客」

西甲「四哥」馬體會今晚會造訪榜尾科爾多瓦，雖然部分球員早前服役影響「床單兵團」部署，不過對手科爾多瓦都唔係好得幾多，佢哋上仗有3件後衞做咗紅牌阿姑今輪要停賽，呢鋪就算有主場之利都掂唔過，2.05倍「讓客」趁早入貨。

（開賽時間：周日凌晨0:00）

馬體會暫時喺西甲領先排第5嘅西維爾4分，爭前四名形勢雖然樂觀，但為免夜長夢多，今晚遇弱旅一定唔會留手。以高甸為首嘅後防穩健度雖然唔及上季，不過今場對手科爾多瓦鋒力係西甲第二水皮，唔使太擔心會失波啦！

科爾多瓦3守將停賽
季中回巢嘅「馬體會王子」費托表現理想，上仗更轟入重返西甲後首個聯賽士哥，信心大增今仗有力添食。加埋入楔同把握力俱備嘅法國國腳基沙文，面對後防不整嘅科爾多瓦，馬體會絕對有本錢上演入球騷。

科爾多瓦家陣落後尾4嘅艾美利亞7分，護級形勢險峻，種種迹象可見呢班波未夠實力喺西甲立足。佢哋上仗作客皇家蘇斯達雖然先入波，可惜最終都要輸1:3，至慘係班球員沉唔住氣，守將恩拿高盧比斯、丹尼爾賓尼路斯、阿歷山大彭迪先後被逐，今晚唔使預佢哋落場。一下子少咗3件，佢哋想憑條殘缺防線頂住急於搶分嘅馬體會，真係諗都唔使諗！