Combo King：鳳凰衝冠夫添爭Ｗ

當歐洲各大聯賽打得激烈之際，阿King亦冇走漏亞洲波，今日晏晝澳職上演前列大戰，由老二威靈頓鳳凰主場迎戰三哥墨爾本勝利，前者上仗意外輸波，為爭奪常規賽冠軍，今仗實在不容再失，主勝有2.18倍值得捧場。

（有線64及203台周日下午3時直播）

飛燕諾傷疲盡起「克」敵
威靈頓鳳凰上仗意外慘吞FC悉尼三蛋，仲有艾拔尼亞拿被逐搞到要坐波監，突然失準只因受國際賽期拖累，多名主力如尼敦般斯、保沙爾、湯杜爾及麥堅治等要打太公波缺陣，咁樣輸法實屬情有可原。儘管墨爾本勝利近八仗僅一敗，狀態都唔曳，但當中有四場係和波，睇番聯賽積分榜雙方只差一分，形勢非常緊湊，鳳凰為爭奪常規賽冠軍，今仗不能再大意，好彩尼敦般斯、保沙爾等球員已經歸隊，夫添出擊兼有地利之下唔赦墨軍，阿King對主勝充滿信心。

至於荷甲阿爾克馬爾主場對飛燕諾，飛燕諾傷疲盡起，可以最佳陣容爭取四連勝，小讓平半值博。

（now 670周日晚6時30分直播）

同時間開波仲有俄超辛尼特主場硬撼莫斯科中央陸軍，後者連盃賽已取得四連捷，預計領先佢哋五分嘅一哥辛尼特唔敢冒進，今仗必定穩陣行先，況且兩軍近年碰頭均少交收，入球細乃不二之選。

（now 671周日晚6時30分直播）