樂比堅尼 ：美斯帶傷敲巴塞半場細

老實講樂比較少投注巴塞或皇馬啲波，因為盤口永遠辣到得人驚，但反佢又需要極大勇氣，撇除心理障礙齋睇數據，巴塞作客唔係惡晒，尤其係經過國際賽洗禮，班球星隨時有疲態，美斯亦有輕傷在身，故今晚作客切爾達可能較慢熱，建議捧1.61倍半場細。

（now632台及TVB13周一凌晨3:00直播）

切爾達防守硬淨
巴塞雖然係西甲作客成績最好嘅球隊，但若計算外國莊家亞洲盤，贏盤率查實僅得35%，全西甲排尾3，不過馬會甚少為巴塞開讓球盤，故大家不妨向大細盤埋手，因為巴塞作客半場通常較少入波，14場聯賽僅得5次入2球，其餘9場均在兩球以下，一時三刻未必破到切爾達嘅「鐵桶陣」。

事實上，切爾達防守勁旅係有一手，首循環作客魯營球場，就曾經爆冷贏1:0，當時半場比數係0:0，另外佢哋今季主場曾擊敗馬體會2:0，上季主場亦贏過皇馬2:0，兩場波半場比數都係0:0，睇番切爾達今季13場聯賽主場賽事，共有11場半場入球喺1球或以下，所以呢個中位數1.5球嘅半場細數據係幾強。

女Fans紋美斯上身

至於大家最關心當然係美斯嘅傷勢，佢雖然有向阿根廷國家隊報到，不過兩場熱身賽都冇上陣，大家都知美斯就係收視保證，最近1位叫Dalma嘅阿根廷女球迷，就將美斯嘅巨型盤球圖案紋喺背脊，唔使講佢嘅最大願望，就係見到偶像盡快落場。巴塞會方就話美斯傷勢無礙，歸隊後有輕鬆操練，今場應可披甲，但美斯自己就話隻腳仲痛，無論美斯最終紮住上陣，巴塞相信都未必咁快入到局。

樂比推介：
切爾達（半場細）