Mic少：光輝拆散噴射機

主將歸隊爭連捷
今季澳職常規賽競爭非常激烈，出現五強爭霸局面，排第五位嘅珀斯光輝今日客戰包尾嘅紐卡素噴射機，正係搶分良機；光輝上仗終於打破九場不勝悶局，重拾信心，餘下四輪比賽必定踩盡油搏殺。反觀噴射機已緣盡季後賽，球員等收鑼放假，相信唔會破壞光輝大事，客W1.82倍絕對值博。

（有線64及203台周一下午3時直播）

其實珀斯光輝今季大部分時間高居榜首，但球隊由年初開始陷入低潮，竟然連續九場贏唔到，令爭標處形勢淪為被動。慶幸球員終於「瞓醒」，上仗殘陣之下驚險反勝西悉尼流浪者3比2，搶到救命三分之餘，亦打破連場不勝心理樽頸，可望藉此重拾上半季霸氣。另一個好消息，光輝三位主力丹尼爾達施華、積克鄧肯、占美麥卡倫踢完國際賽歸隊，今仗陣容齊整，勝算更加高。

噴射機冇Heart等收咧
紐卡素噴射機踢廿三場聯賽錄得兩勝八和十三負，入十八球失四十七球差劣數據，睇見都唔開胃。由於球隊已無法進身季後賽，加上澳職冇降班制度，對噴射機而言，餘下聯賽只係陪太子讀書，爭勝鬥心已蕩然無存。事實上，睇番噴射機近五場聯賽，其中四場冇波入，反映球員早已無心戀戰，更何況佢哋過去五次對珀斯光輝全敗收場，完全被對手食往，今仗更加凶多吉少。