黃興桂：比歷連尼只係中庸級數

「智利工程師」比歷連尼上季接手曼城，憑住一貫低調作風，讓麾下高薪球星順其自然咁自由發揮，一改前任文仙尼嘅鞭策式管理，最終意外地力壓利物浦後上奪冠，連埋英聯盃錦標，佢首季登陸英超就攞到雙料冠軍，係咪好好嘢呢？不過凡事唔好睇得咁表面，睇下今季就知啦！比帥係屬於偏向悶啲、招數唔多嘅教頭，唔似得車仔領隊莫連奴激情四射兼鬼計多端，臨場亦欠缺變招應對，甚少使出令人驚奇嘅調兵遣將協助球隊反勝。上季「藍月亮」人才濟濟，能夠恃質取勝，而比帥以呢種Hea住教嘅溫和方式，令眾將盡情發揮，結果攞到冠軍。

但嚟到今季，比歷連尼並冇思變，繼續沿用呢種方式執教，而球隊紀律開始崩壞，主帥都咁Hea，球員心態自然變得懶散，最重要係「藍月亮」高層野心極大，但偏偏曼城喺近兩屆歐聯都係16強止步，擁有如此金鑽陣容都未能有所突破，足以證明比帥嘅級數只屬中庸，點同莫連奴、皇馬教頭安察洛堤及曼聯傳奇主帥費格遜相提並論呀？

跌Watt球隊大駁火
講番今晚英超，曼城主場對韋斯咸，以及紐卡素主場對熱刺，自從3月頭Peter遠赴英倫睇波後，呢4隊算係英超近期跌Watt跌得最嚴重嘅球隊，預計佢哋都希望盡力爭勝爬出谷底，因此呢兩仗都係「駁火格」，入球會偏高，不妨玩吓大盤過關。

金句：有辣有唔辣的，沉默寡言、順其自然的領隊