卡爾萬：曼城搏命讓主扑錘

「比家軍」保帥保前途
曼城喺爭標衝刺階段甩晒轆，英超冠軍已經凍過水，領隊比歷連尼聞到魷魚香，盛傳佢過唔到今季。之不過比帥失勢，捷西斯拿華斯、費蘭甸奴等「比家軍」，為保帥保前途肯定盡砌，今輪英超佢哋返主場鬥韋斯咸，阿古路、大衞施華等主力亦要踢好波向「藍迷」交代，捧1.57倍「讓球主勝」啱數。

（now621台周日晚8:30直播）

韋斯咸殘陣 用卡頓高爾掛帥
「智利工程師」比歷連尼落鑊消息傳到勁行，拜仁主帥哥迪奧拿、皇馬教練安察洛堤、前阿根廷領隊沙貝拉都被視為接替人選。正所謂一朝天子一朝臣，曼城隨時換帥，由「工程師」親手羅致嘅費蘭甸奴、捷西斯拿華斯、費蘭度法蘭斯高等「比家軍」親兵，為咗保大佬又好、博「未來教頭」嘅歡心都好，嚟緊有落場機會嘅話，點敢唔踩盡油搏老命先？

再講，曼城最近雖然輸多贏少，6場聯賽僅得2勝4負，但值得留意嘅係，「藍月亮」輸波全部都係作客出戰，但每當返到主場即刻表現脫胎換骨，近3場贏晒之餘，更成功喺保持清白身下斬獲10球。既然主場踢得咁醒神，上輪曼市打吡梅開二度嘅阿古路，同埋近3次主場披甲都有進帳嘅大衞施華，梗係要趁機做齣好戲安撫吓班「藍迷」啦！

韋斯咸自1月底作客淨吞利物浦兩蛋開始，近10場英超淨係贏得1場，表現曳到震。最慘係「錘仔幫」踢作客波唔掂，近8場4和4負，除咗輸畀包艇嘅李斯特城外，對住前列嘅車路士、阿仙奴同利物浦亦例牌投降，每場最少要吞兩隻光蛋。

更何況箭頭安拿華倫西亞喺上場鬥史篤城整親腳，就算日前已經復操，可惜今場上陣機會只屬五五波，加埋迪亞法沙高同安祖卡路爾養傷，搞到教頭艾拿戴斯要搵回晒塘嘅卡頓高爾掛帥衝鋒，想唔捱打都難啦！