法達斯維：巴塞半場勝追多鋪

时间：2015-04-21 00:00:00 来源：原创

MSN魯營搶慣韁歐聯8強爆發Round 2，巴塞隆拿返主場再鬥巴黎聖日耳門(PSG)，PSG有王牌伊巴謙莫域刑滿復出，落後兩粒勢必大舉反撲，但自歐聯改制後，從未有球隊喺首回合主場輸1比3嘅劣勢下成功翻盤，大軍壓晒上去，

MSN魯營搶慣韁
歐聯8強爆發Round 2，巴塞隆拿返主場再鬥巴黎聖日耳門(PSG)，PSG有王牌伊巴謙莫域刑滿復出，落後兩粒勢必大舉反撲，但自歐聯改制後，從未有球隊喺首回合主場輸1比3嘅劣勢下成功翻盤，大軍壓晒上去，隨時畀弗到爆嘅巴塞「MSN」美斯、蘇亞雷斯同尼馬拮多兩刀，況且「地上最強」喺魯營打盃賽勁旺半場勝，值得再追多鋪。

(有線61及201台周三凌晨2時45分直播)

PSG靠伊巴復出追數
首回合聖日耳門中堅大衞雷斯好似紙板咁，畀巴塞前鋒蘇亞雷斯狂通坑渠話咁易入兩粒，搞到喺主場輸1比3，今仗去到魯營球場，有王牌伊巴謙莫域同中場馬高華拉堤坐完波監可披甲，為咗收復失地，冇得諗一定要豁出去進攻。不過PSG顧得前嚟亦好難顧後，除咗啱啱取得喺巴塞生涯第400粒嘅美斯勁弗，蘇亞雷斯同尼馬首回合包辦3個入球一樣着晒火，單計近4仗「MSN」鋒線就轟入10球，以大衞雷斯為首嗰條PSG豆腐渣防線，谷晒上去盞衰多兩錢重。

查實自歐聯改制後，從未有球隊喺淘汰賽首回合主場輸1比3後，次回合作客能夠翻盤晉級，若果計埋歐冠(歐聯前身)，只得1969年由荷蘭球王告魯夫率領嘅阿積士，能喺同樣劣勢下作客贏番賓菲加3比1，再靠重賽贏波出線，可見PSG晉級前景，剩番渺茫同冇機會。

巴塞打盃賽速戰速決
加上巴塞今屆各項盃賽喺主場打咗8場波，唔單止贏晒，當中有7場均於上半場取得領先優勢，包括上圈對曼城同分組賽擊敗PSG之役，證明「地上最強」於魯營出擊特別搶韁，今仗必趁住PSG初段大舉進攻嗰陣，大打反擊拮多兩刀，下半場就可hea住等收工，斯維力撐巴塞半場勝。

判官look一look：慕安 Svein Oddvar Moen
國籍：挪威

年齡：36

曾執法主要大賽：

歐聯、歐霸盃、2016歐國盃外圍賽、2014世界盃外圍賽

執法場數：85

黃牌數：316　平均黃牌：3.72

紅牌數：15　平均紅牌數：0.18

判12碼：16

平均判12碼次數：0.19

今屆執法場數：4