笛子波童 ：歐聯8強次回合 皇馬大有體頭

巴拿貝23仗 場場士哥
歐聯8強次回合，皇家馬德里於主場和馬德里體育會合演季內第八次首都打吡戰。首回合兩隊打和0比0，皇馬今季喺巴拿貝出戰廿三場從未試過冇波入，同時馬體會今季三次嚟到巴拿貝亦能取得士哥，一旦出現入波雙方肯定義無反顧鬥搏拳，波童揀1.95倍大盤。

（有線61、64、201及203台周四凌晨2時45分直播）

皇馬首回合作客馬體會表現其實已經算唔錯，奈何對方門將奧比歷如有神助屢救險球。今場皇馬陣容嚴重不整，左閘馬些路停賽，中場莫迪歷、翼鋒加里夫巴利及前鋒賓施馬因傷肯定缺陣，想入波要靠近期回勇嘅基斯坦奴朗拿度。皇馬今季主場踢咗廿三場正式比賽從未出現0比0賽果，而且佢哋對上一次歐洲賽主場冇入波要追溯至2011年4月，之後廿二場主場歐洲賽一共入咗六十六球，平均每場入三球，加上佢哋喺主場球迷面前甚少打守勢波，所以唔使太過擔心佢哋入唔到波。

馬體會基沙文着晒火
馬體會除咗保持本季七次打吡戰不敗，三次嚟到巴拿貝更取得五個士哥，教練施蒙尼慣常探用嘅穩守突擊踢法明顯恰到對手。馬體會今場有中場馬里奧蘇亞雷斯坐波監，不過仲有基比、魯爾加西亞等作替補，講踢法呢班硬朗型中場隨時仲啱施蒙尼胃口，料影響不大。

馬體會翼鋒基沙文近況弗到漏，近四場聯賽個人入六球，包括上周末梅開二度助球隊擊敗拉科魯尼亞，可為皇馬後防帶來極大威脅，一旦馬體會真係入一球，皇馬便要入番兩球先可以晉級，相信戰局亦會隨之變得更開放，開大盤機會更高。