蘇斯黑柴 ：多蒙特盡炒法福 買歐霸保險

多蒙特今季成績大倒退，肯定無緣下屆歐聯，功勳主帥高普已經宣布咗教埋今季離隊，令好多蜜蜂兵團粉絲心碎。不過黑柴都佩服多蒙特高層早有準備，原來佢哋喺2012年已經開始同保險公司傾掂數，買咗一份冇歐聯踢嘅特別保險項目，所以今夏會有一筆補償金，當然，球隊經過今季大跌Watt同高普離隊後，相信下季保險公司都唔會再接受呢項投保了。

多蒙特除咗有買冇歐聯踢嘅保險，現階段亦要買下屆歐霸盃參賽資格保險，想踢下屆歐霸盃有兩個途徑，一係贏得今屆德國盃，二係喺德甲打入前六名，基於喺下周中德國盃準決賽要作客安聯球隊場對班霸拜仁慕尼黑，無論點計牌面都係下風，現階段於德甲力爭上游至係保險做法，多蒙特目前排第九位，落後第六嘅奧格斯堡六分，餘下五輪聯賽都要當決賽踢。

多蒙特今晚德甲主場對法蘭克福，黑柴相信佢哋唔會為德國盃而留力，球隊喺歐聯出局後比賽唔多，唔擔心體力問題，反而要爭取大勝以壯作客拜仁行色。多蒙特首循環作客法蘭克福淨吞兩蛋，高普話完全唔知道場波輸點解會輸，今晚聲言要復仇，賽前利好消息係靈魂人物馬高列奧斯傷愈復操，今晚甚有望復出領軍。

（有線64及203台周六晚9時30分直播）

法蘭克福殘陣冇前冇後
法蘭克福喺瘋狂教頭舒哈夫領軍下踢法一直有前冇後，不過自從射手榜領先嘅進攻重心美亞因傷提早收咧後，球隊前線即時死火，連續兩場聯賽零入球。最慘係上仗賽和慕遜加柏全隊踢得最好嘅中堅安達臣班巴，仲有正選左閘奧薛卡雙雙累積五面黃牌要停賽，防線弱上加弱，今晚冇前又冇後，作客西法倫球場難逃大敗厄運，推介多蒙特讓球主勝。