笛子波童 ：生猛鯨魚爆紅鑽

今日下午日職直播有場浦和紅鑽主場對名古屋鯨魚，紅鑽今季表現冇晒霸氣，周中更於亞冠盃先勝後敗被淘汰出局，球隊士氣、體力均受挫，面對三連勝狀態冒升嘅鯨魚冇優勢，波童捧讓球客勝。

（有線61及201台周六下午4時直播）

紅鑽開季聯賽六戰不敗，表面上成績唔錯，不過睇真啲四場勝仗入面，對住山形山神及松本山雅要苦戰到末段先贏波，另外贏湘南比馬及橫濱水手亦係先失波一方，贏得冇咩說服力，仲要留意以上四支有三隊喺今季升班，整體表現唔算標青。

紅鑽亞冠出局洩士氣
再者佢哋周中亞冠盃對水原藍翼喺領先一球下居然反輸1比2，踢完五輪分組賽只得一分，已經肯定無法出線16強，士氣難免受打擊。

鯨魚周中雖然都要踢日聯盃，但競爭性及激烈程度難同亞冠盃相比，何況鯨魚連盃賽在內對上八場比賽只係輸過畀上年三料冠軍大阪飛腳，面對鹿島鹿角、川崎前鋒及廣島三箭等實力分子表現完全唔輸蝕，證明佢哋對強隊有一手。

鯨魚陣中攻擊組合永井謙佑及川又堅暮無論喺球會或國家隊都有好表現，加上後備席上仲有斯洛文尼亞老將路華高域，就算巴西外援李安度杜明基斯未傷愈，依然有力威脅紅鑽防線，除讓球客勝外，大盤亦值得留意。