阿占：阿聯撼墨城大陣仗

「季後賽預演」鬥搶韁
澳職常規賽最後一輪，今日有場「季後賽預演」，由好大機會最終排第4嘅阿德萊德聯，喺主場迎戰第5名嘅墨爾本城。今季兩次對賽都開出入球大，今日再戰，雙方都有後備出嚟「搶韁博上位」，應該踢得放啲，繼續追1.62倍大啦！

（有線64及203周六下午5:30直播）

由於原本排第3嘅光輝被取消季後賽資格，益晒墨爾本城升高一級，肯定會以第5位身份踢季後賽。除非阿德萊德聯開W、而威靈頓鳳凰喺聽日對FC悉尼嗰場波又全失3分，否則「阿聯」就會以第4名完成常規賽，依照咁嘅推論，「阿聯」同「墨城」就極有可能係季後賽首圈嘅對手。

「阿聯」核心復出 鬥牛雙箭搵到食
「阿聯」今季2次作客「墨城」，頭場先贏2:1、之後嗰場輸1:3，睇戰果都知兩軍喪攻對決都幾精彩吓，相信今場波都唔會例外。「阿聯」今戰有守將保加迪停賽，2件中場伊沙亞斯同占士捷高亦累積咗7張黃牌，再食多張就要喺季後賽停賽，為安全計，今仗應該唔會披甲。好在阿根廷中場核心卡路斯卡嘅傷已經好返，有佢復出派牌，「阿聯」一對西班牙前鋒柏保路山齊士同沙治奧施里奧，唔愁冇供應啦！

對家墨爾本城亦有中場積及美爾寧重傷缺陣，另一件指揮官保羅列治亦要坐波監，一班後備趁機博上位，作客實會砌到盡，希望贏波得到教練歡心，季後賽落場預埋佢哋一份，既然兩軍都冇晒心理包袱喪攻，唔玩大玩咩先？

頂占筍盤
阿德萊德聯（入球大）