SAMVO肥叔：維羅納夠薩 趁早買

上周中歐聯同歐霸激戰連場，預計祖雲達斯、波圖、費倫天拿、辛尼特等參賽球隊都攰到爆，因此肥叔建議唔好揀呢類疲兵，始終今日由朝到晚有六十幾場波可以玩，總會發掘到筍嘢，今晚意甲維羅納主場對薩斯索羅，後者近期好似食咗瀉藥咁跌晒Watt，維羅納飛數硬淨值得捧場。

（周日晚9時開賽）

有睇開呢個專欄嘅讀者都知道，薩斯索羅一向都係肥叔愛隊，因為呢班波冇球星但踢得實而不華，同時又冇乜名氣令評級較低，經常獲得受讓堅筍，可惜長路有盡時，由於薩斯索羅幾近上岸，近期好似食咗瀉藥咁跌晒Watt，齋計之前10場聯賽，只係贏得兩場咁大把，當中有5仗輸盤，與季初至季中嗰段勇態相比，可謂差天共地。維羅納雖唔算特別標青，但之前曾喺費倫天拿、羅馬、拿玻里、ＡＣ米蘭等勁旅身上搶分成功兼贏盤，令人刮目相看。初盤維羅納要讓半球，非常合理，而且飛數硬淨，睇嚟莊家都對佢哋幾有信心，為免愈賣愈熱，呢個上盤應該趁早入貨。

拉科護級搏命撐得過
至於西甲早場，「七哥」馬拉加主場對尾四嘅拉科魯尼亞，初盤馬拉加要讓到半一咁辣，全因拉科已經10場不勝，但唔好睇漏馬拉加近7仗僅得兩勝，仲輸過畀伊巴、CF格蘭納達等中下游分子，狀態認真麻麻，寧願信多次為護級搏老命嘅拉科。

（周日晚6時開賽）