李榮基：雲格想贏番次？難啲喎

要數英超關係最差的一Pair領隊，相信非雲格同莫連奴莫屬。今季雲格愛徒法比加斯由西甲回歸英超，被莫帥收歸旗下，阿仙奴首循環作客車路士時，一向冷靜斯文的教授都難忍怒火推撞寸王，雖然欠缺風度有失斯文，卻足見二人的確水火不容。今晚車路士作客酋長球場，儘管雲格充滿信心，但要衝冧車仔大巴，恐怕仍未是時候。（now621台周日晚11:00直播）

雲格曾於英超呼風喚雨，更創下全季不敗奪冠的豐功偉績。只是隨着莫連奴登陸英超，教授就無啖好食，就算寸王曾離開數載，雲格亦彷彿中降頭一樣，9年無冠之外，帶隊對寸王12場未嘗1勝更令這位「廠長」耿耿於懷。

莫連奴大條道理「擺大巴」
今場無論人腳或士氣阿仙奴確有一定優勢，首先，近期聯賽9連勝的兵工廠比起險勝侯城、史篤城及昆士柏流浪的車仔氣勢強得多，進攻流暢度亦令人滿意。張伯倫提前放暑假對兵工廠影響不大，皆因中場三核及高基連個個大勇，就算張伯倫在陣亦只能當後備，而且兵工廠只是一周一賽，無須大幅度輪換，主力個個都可以搏盡。

相反車仔鋒線較大問題，迪亞高哥斯達、杜奧巴未復出，雷米亦上陣成疑。但正因如此，寸王更加大條道理「擺大巴」，情況如同上周對紅魔一樣，讓出七成控球，卻贏了三分，今晚大可以照辦煮碗。最重要是車仔現時領先阿仙奴10分，壓力在對方身上，今場就算守和亦無損大好形勢。