亨格比利：波圖焗攻益晒賓菲加

葡超爭標關鍵戰
今晚葡超爆發爭冠關鍵戰，由賓菲加主場硬撼波圖。波圖落後「一哥」賓菲加3分，想後來居上嘅話，作客都肯定要焗攻。之不過賓菲加嘅銅牆鐵壁今季主場只係失咗4球，波圖焗攻隨時畀賓菲加有機可乘，2.2倍主W值博。

（now676台周一凌晨0:00直播）

呢場榜首大戰全葡矚目，波飛喺上周三已經賣晒，賓菲加球場超過6.5萬個座位今晚將座無虛席。據葡萄牙市場管理學會統計，呢場大戰將帶動2,300萬歐元經濟效益，絕對係全國轟動。到訪嘅波圖經歷咗一個心碎嘅歐聯之旅，以為入梗4強，點知次回合輸番1:6，總比數反輸4:7被拜仁踢出局，加埋佢哋已經喺葡聯盃同葡盃Game Over，聯賽錦標變成波圖唯一目標，你話今仗又點會坐以待斃先？

波圖作客對賽例衰
波圖作客要焗攻，但睇番佢哋對上4次造訪賓菲加得1和3負劣績，況且賓菲加晨早喺歐聯出咗局，以逸待勞，計體能點都比頻頻撲撲嘅波圖勝一籌。再講，賓菲加今季葡超主場只係失咗4球，以安達臣雷沙奧領軍嘅防線穩陣到爆，波圖想搵着數怕且唔容易，空群而出隨時入埋唔夠輸，被連續3場聯賽梅開二度嘅莊拿斯干卡維斯射爆都似！