九叔 ：川崎入球大有「素」圍

今日日職、日乙一齊開快車， 20場波得兩場日職直播，當中大阪飛腳主場對松本山雅，2倍「讓球主勝」好大機會開出。（有線61、201周三下午3:00直播）但係川崎前鋒主場迎戰柏雷素爾，就真係勢均力敵，無論邊瓣都唔及博1.59倍入球大咁穩陣。

（有線61、201周三下午1:00直播）

大久保入波將超三浦
川崎今場花咗好多心思搞宣傳，佢哋繼過去幾年，再一次同相撲名門春日山部屋合作，除咗有相撲手陪小朋友玩遊戲，現場售賣相撲手至愛嘅力餅（一種糯米糕）同火鍋之外，仲將部分觀眾席改成4人卡座，又送埋坐墊。川崎咁大動作，一係因為上場佢哋贏咗甲府，攞到主場日職第100勝，點都要賀賀佢，其次就係鋒將大久保嘉人上場入波，家陣同三浦知良平頭，以139球並列日職歷史上第4射手，今日只要再有進帳，就可以超越三浦。

由於柏雷素爾都唔係善男信女，呢班波同川崎一樣擅打反擊，佢哋7場聯賽入10球，雖然比唔上川崎嘅16球，但係李安度蒙迪拉搭工藤壯人呢個組合，公認係日職最惡頂嘅攻擊拍檔之一，同大久保嘉人、小林悠、中村憲剛呢個三叉有得揮，兩隊「合作」入3球唔係難事，冇理由唔博入球大。