亨格比利 ：野獸回歸祖記急住捧盃玩殘紫百合

意甲今晚加開快車，即將封王嘅祖雲達斯剛啱喺「都靈打吡」失威，今晚主場迎擊兼有「野獸」泰維斯復任正選，有權大勝搞唔掂兩條戰線嘅費倫天拿，捧2.6倍「讓球主勝」。

（TVB301周四凌晨2:45直播）

祖雲達斯上仗以1:2輸畀拖連奴，錯失締造提早6輪聯賽奪冠嘅壯舉。不過冇相干吖，「斑馬兵團」家陣拋甩次席嘅拉素14分，奪冠只係時間問題，如果拉素今晚踩蕉皮失分畀「神經刀」帕爾馬，祖雲達斯贏波就可以喺主場封王，球員鬥心肯定十足。

費倫分心歐霸 意甲3連敗
力爭意甲4連冠嘅祖雲達斯，今晚會有首席射手泰維斯復任正選，夥拍艾華路莫拉達攻堅，加埋已經累積27個意甲罰球進帳嘅派路，都想把握時間省多兩粒，爬米赫洛域頭成為意甲「罰球王」，照計一眾球星唔慌踢得Hea。

作客嘅費倫天拿踢歐霸盃就叻，但係最近喺意甲就死氣沉沉，連輸畀拿玻里、維羅納同卡利亞里，近3年嚟首次錄得意甲3連敗。「紫百合」想爭入前3有難度，都係集中火力搶歐霸盃錦標好過啦！