走肖 ：狼堡「讓客」勒唔住

力爭德盃誓炒丙組仔
德國盃4強今晚繼續開戰，由丙組仔比勒費爾德喺主場對禾夫斯堡，睇怕都幾難爆冷。依家嘅比勒費爾德陣中外援唔算多，牌面上擺明唔夠砌，況且狠堡喺3日內已連續失去歐霸盃同德甲爭標機會，又點會放過德國盃呀？2.17倍「讓球客勝」抵捧！

（TVB13周四凌晨2:30直播）

比勒費爾德 牌面輸蝕
曾經喺德甲企穩過嘅比勒費爾德，近年喺德乙同德丙浮沉，雖然形勢上，今季佢哋有機會升班，弊在依家陣中嘅外援球員，主要得荷蘭前鋒雲達比亞辛同法國中場大衞烏姆，就算佢哋晉級過程中淘汰過哈化柏林、雲達不來梅同慕遜加柏，去到4強對住超班嘅狼堡始終蝕章，想入決賽就難啲咯。

射手巴斯杜斯復出
另邊廂嘅禾夫斯堡喺歐霸盃被拿玻里踢出局後，日前喺聯賽作客以0:1不敵慕遜加柏，連續4場不勝之餘，仲造就榜首嘅拜仁提早奪得德甲冠軍，教練赫基話依家佢哋已經冇嘢可以再輸，惟有寄望呢班波放低包袱打場翻身戰。仲有呀，上場休息嘅射手巴斯杜斯同中場舒賀爾尼更加會復出，前線火力有保證，炒起丙組仔一啲都唔出奇喎！