卡爾萬 ：華歷簡奴死火頂唔住搏殺蝙蝠兵

華歷簡奴班箭頭唔係啞火就受傷，就連防線表現都走晒樣，搞到球隊近期戰績下滑，今晚佢哋喺西甲快車迎戰「剋星」華倫西亞，「蝙蝠軍團」正為來屆歐聯入場券搏命，今鋪點會放過搶分好機會，一於捧1.75倍客勝。

（now632台周五凌晨2:00直播）

華倫近11次交手8勝
華歷簡奴首席射手貝爾奴成個4月淨係斬獲1球，上場更被貶做後備。次席射手巴迪斯達奧又話腹股溝有傷未必踢得，就連「野獸」文路祖都冇貨賣，成條鋒線冇個靠得住。最弊係佢哋條防線表現亦慌失失，近3場敗仗夾埋失咗10球，就算佢哋近6仗主場贏咗5場，但近況差成咁，都真係捧唔落手囉！

華倫喺西甲排第4位，僅領先西維爾2分，為咗保住張歐聯入場券實搏到盡。好在「蝙蝠兵」表現生性，菲侯利、尼格度（圖右）兩名進攻好手近3場各省2粒唔在講，柏高艾卡沙同柏利祖亦有進帳，加上鋒將皮亞堤克服傷患候命搏殺，今場要砌低近11次對壘贏咗8次嘅華歷簡奴，話都冇咁易。