法達斯維：皇馬征西讓波危

歐聯西甲作取捨
皇馬迎來一連四場最兇險嘅魔鬼賽期，頭關係今晚聯賽作客硬撼西維爾。皇馬嚟緊有歐聯後顧，難免要作出取捨，隊長卡斯拿斯亦暗示「大耳盃」比聯賽更重要，「五哥」西維爾同樣需要贏波爭來屆歐聯入場券，何況佢哋乃今季聯賽唯一主場不敗之師，有得受讓斯維強捧西維爾讓球主勝。

（now 632周日凌晨2時直播）

皇馬喺賓施馬同加里夫巴利受傷下連贏三場，教頭安察洛堤改用「小豌豆」查維亞靴南迪斯同占士洛迪古斯夥拍C朗收到奇效，如今加里夫巴利亦傷愈可候命，看似雨過天青，實則暗湧處處。皇馬先喺今仗作客「五哥」西維爾，之後兩個周中於歐聯4強火併祖雲達斯，而夾喺中間仲有場聯賽主場對華倫西亞，名副其實係魔鬼賽期。

上季皇馬能榮膺歐聯同西盃嘅雙料冠軍，同關鍵時刻放棄聯賽有關，難怪隊長卡斯拿斯日前表示歐聯各隊奪標機會均等，仲話皇馬粉絲對「大耳盃」情有獨鍾。加上兩大主力賓施馬同莫迪歷今仗繼續缺陣，唔排除「銀河艦隊」會重施故技，對聯賽作出戰略性放棄。

西維爾主場未輸過
西維爾同樣要兼顧聯賽同歐霸兩條戰線，不過歐霸水準始終較低，難度冇皇馬咁大，周中造訪伊巴留晒力仍輕取3比1，今仗必精銳盡出，前鋒卡路士巴卡今季已經入咗19球，而且佢哋係今季西甲唯一主場不敗之師，上月落後兩球下力拚逼和巴塞，可見其比斯祖安主場嘅威力。適逢「四哥」華倫西亞周中失分，令西維爾已追至與華倫同分，為爭取前四嘅來屆歐聯入場券，絕對唔赦之前兩季造訪此地都輸波而回嘅皇馬，讓球主客和仲受讓一球，西維爾嘅讓球主勝不容錯過。