Combo King ：PSG伊巴回歸盡數格

歐洲各大聯賽都進入尾聲，不過法甲嘅爭標形勢依然激烈，阿King就睇中今晚尾場力爭衞冕嘅「一哥」巴黎聖日耳門（PSG）作客南特，前者有王牌伊巴謙莫域坐完波監霸氣回歸，面對無欲無求嘅南特，勢必盡力數胡洩憤，PSG嘅讓球客勝乃不二之選。

（TVB 302周一凌晨3時直播）

雖然PSG連續三屆於歐聯8強出局，但藉住一波五連勝後重登聯賽榜首，唔計周六晚賽果，PSG暫只以三分騎住「二哥」里昂，衞冕冠軍絕非坐定粒六。早前PSG王牌前鋒伊巴謙莫域衰多口鬧爆法國足球水準低，遭重罰停賽四場，儘管後來獲減刑一場，令佢今仗作客南特可重新掛帥。不過伊巴一向火爆，一定會將滿肚冤屈氣盡情發洩，用更加士哥證明法國足球水準，實在配唔起有一支球星如雲嘅PSG。而且排第十嘅南特一早搶夠分，踏入季中開始hea踢，睇番對上三場聯賽PSG缺少伊巴都全勝轟十二球，今仗多埋呢位霸氣神鋒壓陣，南特仲點頂得住呀？既然PSG咁弗無謂拗頸，簡單要個讓球客勝。

阿里辛特換帥收效
至於挪超阿里辛特主場對波杜基林特，阿軍之前怒炒教頭阿比卡，並扶正助教費利臣即立竿見影，從上仗反勝華拉倫加，可見眾將嘅精神面貌全面提升，遇上未開齋嘅包尾大幡波杜基林特仲唔食住上咩？主勝不容錯過。最後西甲華倫西亞主場鬥伊巴，「蝙蝠兵團」上周中意外遭華歷簡奴逼和失分，令其前四嘅歐聯席位唔多穩陣，好彩撞正連輸四場堅頹嘅伊巴，絕對係反彈好時機，直取讓球主勝。

（now 632及TVB 13周一凌晨1時直播）