阿占：射手啞火！鳳凰點讓波？

澳職季後賽今日繼續有精彩好戲，威靈頓鳳凰主場出擊同墨爾本城爭奪4強最後一席，鳳凰今季整體表現無疑係較好嘅一隊，更曾經有機會問鼎常規賽冠軍，可惜佢哋就喺季後賽開打前先嚟跌Watt，認真濕滯！賽前獲選為澳職最佳球員嘅鳳凰前鋒尼敦般斯，最近好諷刺咁深陷入球荒，主場對住墨爾本城隨時咬唔入，捧受讓平半嘅墨爾本城仲好。

（有線64周日下午3:00直播）

兩個月前，威靈頓鳳凰一度高踞常規賽榜首，王牌前鋒尼敦般斯風頭一時無兩，佢早兩日獲澳洲媒體選為今季澳職最佳球員亦順理成章。睇番呢位超級射手今季9場有波入嘅聯賽，鳳凰未逢一敗，不過最大鑊係佢深陷5個星期嘅入球荒，鳳凰喺呢段期間5戰只得1勝1和3負劣績，以咁嘅狀態逐鹿季後賽，教頭摩力克真係始料不及。

雖然墨爾本城同樣喺常規賽最後4場不勝，但呢支表現飄忽嘅球隊如果有心死守，絕對有能力踢出高質素防守。翻查數據，墨爾本城近5次聯賽對鳳凰錄得1勝3和1負，踏入今年後兩次對賽都係悶和0:0，證明墨爾本城絕對有力頑抗，今場明知實力唔及對手，穩守突擊隨時有意外收穫。

澳職季後賽賽制
今輪為澳職季後賽淘汰圈賽事。比賽以1場分高下，若90分鐘內打和則進行加時，再和互射12碼決勝負。

頂占筍盤：墨爾本城（讓球客勝）