山度士：祖記主場硬淨 唔赦皇氣

歐聯今明連續爆發兩場4強首回合大戰，今晚深夜先有祖雲達斯主場迎戰上屆冠軍皇家馬德里。意甲球隊近幾年喺歐洲賽事冇乜佳作，但嚟到今季終於翻生，除祖記打入歐聯4強，歐霸盃亦有拿玻里及費倫天拿兩支4強分子。祖記今屆於歐聯主場發揮極佳，由分組賽開始至淘汰賽5戰4勝1和。皇馬雖然多球星，球員平均質素亦優於祖記，但由於係首回合，佢哋唔使心急求勝，只要唔輸，次回合返巴拿貝再嚟料都未遲。今仗要讓平半盤口唔抵玩，祖記喺主場應可坐和望贏，捧下盤啱數。

至於周四凌晨開打嘅巴塞隆拿大戰拜仁慕尼黑，巴塞「MSN」攻擊組合近期弗爆，不過讓到半一盤口辣咗少少，始終歐聯嚟到4強階段已冇弱旅，更何況嗰隊仲係拜仁添！彼此實力差距不大，要淨勝兩球先至贏晒全個盤並唔抵玩。拜仁現時傷兵成籮，作客魯營肯定先求穩守，預計上半場大家都會好小心，打和機會高，但度士認為人腳完整兼有主場之利嘅巴塞可以喺下半場入波小勝拜仁，因此半全場嘅「和主」應該係唔錯選擇。