蘇斯黑柴：巴塞殺仁唔眨眼

美斯歐戰100復仇記
歐聯4強戰今夜星光燦爛巔峰決，四屆冠軍西甲一哥巴塞隆拿主場迎戰五屆冠軍德甲一哥拜仁慕尼黑，兩軍實力原本旗鼓相當，不過相比之下巴塞目前陣容更完整，狀態更勝一籌，加上誓報兩年前慘敗屈辱嘅無比決心，主場有力先拔頭籌，巴塞讓半一捧上盤。

（有線61、64、201及203台周四凌晨2時45分直播）

今場星戰話題多多，拜仁教練哥迪奧拿與愛徒堤亞高艾簡達拿，將首度重返魯營球場倒戈戰舊主，哥帥並遇上多年戰友巴塞教練安歷基，但以兩大霸主近期狀態比較，巴塞無疑勝一籌，安歷基領軍得勝率尤在當年哥迪奧拿之上，球隊尤其擅於主場打硬仗，近七場主場賽事全勝，對手包括曼城，皇家馬德里同巴黎聖日耳門。

拜仁折雙翼作客防守差
巴塞剛於西甲作客大炒科爾多瓦8蛋，前線美斯、蘇亞雷斯同尼馬組成嘅「MSN」夢幻組合合共轟入6球，狀態弗爆。球隊今仗戰意加零一，賽前重提兩年前歐聯4強兩回合合共慘吞拜仁7蛋血案，復仇心切；今場亦係「球王」美斯代表巴塞隆拿第100場歐洲賽事，至今已累積75個歐戰入球，過往美斯對住紐亞冇啖好食，不過依家有蘇亞雷斯同尼馬支援，全隊可以夫添出擊，坐鎮魯營極有決心復仇兼打破宿命。

拜仁近期狀態反覆，主要原因係傷兵問題嚴重，剛周末聯賽淨吞利華古遜雙蛋，雖然該仗留力，但狀態同氣勢明顯難同巴塞相提並論。今仗佢哋續有洛賓、列貝利、阿拉巴同畢斯杜巴等主力因傷缺陣，雖然箭頭羅拔利雲度夫斯基會負傷戴保護面罩上陣，但前線缺少一雙魔翼令整體戰鬥力大幅減弱，何況哥帥領軍兩季以來，拜仁變得欺善怕惡，防線一遇硬仗即散，上屆歐聯4強兩回合就淨吞皇馬5蛋，踏入今年亦先後大敗於禾夫斯堡、慕遜加柏、波圖同利華古遜腳下，既然上圈首回合作客波圖都要輸1比3，今仗作客魯營面對熟晒佢路嘅巴塞更難幸免，主隊有力先下一城。