走肖 ：川崎廣島Goal手大鬥法

爭破日職入球紀錄
川崎前鋒今日喺日職主場對廣島三箭，可以話係兩大射手大久保嘉人同佐藤壽人嘅「大」決戰，事關佢兩個都有機會，打破中山雅史保持嘅日職歷代最多入球紀錄，正面對撼當然唔想衰畀對方睇，落到場實盡情數胡啦，1.77倍入球大抵玩！

（有線61、201周三下午2:00直播）

好唔開心，我最鍾意嘅日職球會川崎前鋒，最近走勢回落，日前作客以1:2不敵FC東京之餘，仲有守將車屋紳太郎食紅牌，加上後防有幾件傷兵，形勢上都幾不利。但正因為咁，今場川崎想搶分就要踢得更進取，相信首席射手大久保嘉人唔會令我失望嘅。

川崎後防不整易失波
事實上，大久保嘉人喺上場嘅「多摩川打吡」先開紀錄後，已經累積攻入140粒，超越咗三浦知良進佔日職歷代最多入球第4位，距離第1位嘅中山雅史17球，就算今季做唔到No.1，下季都好大機會破紀錄，所以各位唔需要擔心，大久保嘉人唔會因為川崎走勢差，失去入波動力。

廣島佐藤壽人博反彈
廣島三箭日前喺主場以2:0砌低仙台維加泰，着晒火5連勝。雖然佐藤壽人腳風回落，但其實佢以累積147球，位列日職歷代最多入球第3位。雖然佢呢排腳風麻麻，之不過川崎後防不整，今仗有望爭取入球重新證明實力博反彈，要開入球大唔難喎！